India atema UN permanent züngsem Syed shimogo

New Delhi, November 16 (Agencies): United Nations nung India atema taruba Permanent züngsem atema senior ketdangser aser taoba mapang External Affairs Ministry otongdar, Syed Akbaruddin shimogo aser pai Asoke Mukerji melentsü.
1985 batch IFS ketdangser, Akbaruddin ya tang Ministry of External Affairs Ministry nung Additional Secretary teinyaktak lir aser pa iba Ministry indang External Publicity division nung küm asem ser tesadang otongdar inyakba mapang division nung social aser digital media nung temelenshi bener arutsüogo.
Akbaruddin indang tongtibangba mapaji, India nunger UN Security Council nung permanent züngsem akümtsü atema inyaktsü, iba den külemi India tongtibang onüktem benoka jembitsü.
Tawa Indo-Africa Summit nung Akbaruddin ya Chief Coordinator liasü. Pa Geneva nung International Atomic Energy Agency (IAEA) nunga tenzükogo aser West Asia nunga menden balala aika nunga tenzüka aruogo.