India Ato Kilonser, Modi-i 12 buba South Asian Games lapoktsüogo

(Abelen) India Ato Kilonser, Narendra Modi-i Assam kübok Guwahati yimti nung 12 buba South Asian Games lapoktsüba angur. (Achijilen) India asayartemi asayamong mascot, Tikhor sülen anidaka, march past sentong nung shilem agiba angur. (Guwahati, February 05)

Guwahati, February 05 (Agencies): India Ato Kilonser, Narendra Modi-i 12 buba South Asian Games (SAG) Assam kübok Guwahati yimti nung tentetba Indira Gandhi Athletics Stadium nung tanü, Hokolbar nü lapoktsüogo.
“Ni 12 buba SAG asayamong lapoktsür. Tan asayamong asayaba ajanga India kübok North East nung shishilembaba, tongtepratepba aser saisapongba sabangtem tamendakdak sür terenlok aser yimji yimjung alitsü imlar,” ta Modi-i sangoktsü.
“Taruba anogo 12 nung asayartemi tesendaktep tajung yanglubaji taküm piyong atema alitsü kechiyong saisapongdangbo asen bendangdaktsübaren ajunga agiena kati ka den tesendaktep tajung yangluteter,” ta pai ashi.
“Tan asayamong ayonga asayaba ajanga South Asian linük ajunga ka küma lujemdaktsür lir. South Asian Association for Regional Cooperation (SAARC) nung züngsemba linük 8 nungi asayar tajungtibatem jakdang nokdaktsü maongka anguba atema kanga pelar,” ta shia, kija, lokti aser linük terenlok alitsüren nung saisapongtsüji tongtipang shilem aliba olen ka Modi-i metetdaktsü.
“Tan asayamong nung shilem agiba ajanga sentaktepshitsüba jagi saisapongtsü sabang nung dang masü saka shishilembatsü aser raliwalitsüren sabangtem nunga asen ajak nem tajangzük tulu bener arutsütsü imlar,” ta pai shisem.
Tanü asayamong lapokba sentong nung Assam aser Meghalaya Governor, Chief Minister, Union Sports Minister, Sarbananda Sonowal aser India Olympic Association (IOA) Tir, N Ramachandran nunger densema liasü.
SAARC nung züngsemba Afghanistan, Bangladesh, Bhutan, Maldives, Nepal, Pakistan, Sri Lanka aser India nungi asayar 2600 dak temai tan asayamong nung toktepa shilem agitsü.
Assam kübok Guwahati aser Meghalaya kübok Shillong na nung ayongba asayamong nung saisapongtsü shilem 23 aser tetoktepba 228 alitsü.
Gold 228, silver 228 aser bronze 308 densema tan asayamong nung ajak agi medal 764 agütsütsü renema lir.
Taoba mapang asayaba SAG asayamong nung medal timba anguba India telok nungi tetsür 245 densema, ajak agi asayar nisung 521-i tan asayamong nung shilem agitsü renema lir.
Nagaland densema, North East aser India ajunga indang sobaliba sentong tajungtem sayua tanü asayamongji kanga meraketa lapokogo.