India, Australia, Japan-i kiralongra anema raratsü atema jembi

New Delhi, December 13 (Agencies): Bodhbarnü India, Australia aser Japan linüktemi maritime security atema taliba amalitepa inyaktsüla, ta bangjemogo.
Linük asemisa kiralongra anema amalitepa longjemer raratsü atema bangjem.
Tanü New Delhi nung India Foreign Secretary, S Jaishankar leniba nung New Delhi nung 4buba India-Australia-Japan trilateral senden nung linük ana nungi lenir ana dena liasü, aser iba senden nungsa Indo-Pacific region nung rongsenkettsüng terenlok atema amalitepa inyaktsü, yimjung alitsü, democracy wazüka ayutsü aser rongsenkettsüng aintsü onüktem nung o lemtepa liasü.
Parnoki Indo-Pacific region nung yimtenren aser security dak sendakba nung ASEAN centrality pusemer, ta metetdaktsü.
Senden nungsa Japan Vice Minister-i sangküm linük asem senden ya par linük yimtiba, Tokyo nung amentsü atema benoka liasü.
Mongolbarnü `2+2 dialogue` senden nung India aser Australia nati linük ana tesendaktep dak sendakba onük aika nung o lemtepa liasü aser iba mapang nung tesem nung linük ajak ajangzüktsü atema inyaktsü bangjem.
“`2+2 dialogue` senden ya taoba mapang Australia Ato kilonser, Tony Abbott-i 2014 küm India semdangba mapang nung benoka liasü.
Ita ka tejaklen India aser Australia na den US aser Japan linüktem Manila nung security atema senden ka amenba sülen ita ka shi lir tang linük ana senden menogo.
Hombarnü India External Affairs Minister (EAM), Sushma Swaraj leniba nung New Delhi nung 15buba Russia-India-China (RIC) senden mena liasü. Iba senden nung Russia Foreign Minister, Sergey Lavrov aser China Foreign Minister, Wang Yi na aden.
Iba senden nunga linük asem senteper alima nung kiralongra anema amalitepa longjemer raratsü aser kiralongrartem senotsü lenmang nokdangtsü bangjemba sangdong ka metetdaktsüogo.