India-Bangladesh arrtsü shibangtsü: Rajnath

Duliajan (Assam), March 30 (Agencies): Bangladesh nunger ozüng alema Assam telungi aitba atema Congress nem tai tonglokja Bodhbarnü Union Home Minister, Rajnath Singh-i, Centre sorkari India-Bangladesh arrtsü shibangtsü, ta ashi.
Tanü Assam, Dibrugarh district kübok Duliajan nung election nüboyimba sentong ka nung jembidang Rajnath-i, “Assam telungi bendangertem aitba atema Congress-i kodanga tebilemtsü makar. Vote angutsü atema dang parnoki state raksatsüogo. Bendanger shinga Assam telungi maitettsüsa onoki arrtsü khenyongi shibangtsü,” ta ashi.
“Bangladesh linük tentetba mapang nungi Assam telungi bendangertem aiter. Ni parnok   (Congress) dang ya asüngdangnür, kechiba nenoki arrtsü meshibang (?) Asen litsü telungi aitba kechiba nenoki menokdang (?)” ta Rajnath-i ashi.
“Atangjiji, parnoki iba atema tebilemtsü makar. Tetenzük nungi Congress-i kodanga bendanger telungi aitba onük atema meinyak,” ta paisa ashi.
“Ni India-Bangladesh arrtsü tesemtem semdangogo aser Bangaladesh ketdangsertem den jembiogo. Ozü sorkari bendangertem aitba tebilemtsü atema inyaktsü. Iba arrtsü khenyongi shibangtsü atema onoki mapang tera nüngdaktsü,” ta pai ashi.
BJP lenir tejen Rajnath-isa,  Ato kilonser, Narendra Modi-i ochimashi anema inyaktsü azüngashiogo, ta ashi.
“BJP-i aniba sorkar aruba sülen Centre nung ochimashi ken o kata mali ta alimai meteta lir. Assam assembly election nung takok ngura BJP-i ochimashi meshimeshia malitsü atema inyaktsü,” ta paisa shisem.
Assam nung April 4 aser 11 nü assembly election agitsü.