India-Bhutan tesentaktep ajanga Northeast India ajangzüktsü: Rijiju

Thimpu (Bhutan), July 04 (Agencies): India aser Bhutan na International arrtsü nung security tajungba akümtsü atema ken o jembiba den külemi Himalayan linük, Bhutan litsü ajanga Arunachal Pradesh nung Tawang aser Assam na gari lenmang agi sentakteptsü atema jembiogo.
Anogo ananü Minister of State for Home, Kiren Rijiju-i Bhutan, Thimpu semdangba mapang Ato kilonser, Tshering Tobgay densema Bhutan lenirtem den Indo-Bhutan arrtsülen security akangshitsü, Bhutan aser Assam, Arunachal Pradesh den West Bengal state tem den shishilembaba jenjang tajungba akümtsü, sobaliba lemsateptsü onük densema tongtibang onük aika jembiogo, ta sorkar osang ka ajanga ashi.
Hombarnü Rijiju den senden amendang Bhutan Ato kilonseri Bhutan nüburtem tebilemtsü onüktem lir, ibayongji arrtsülen security atema linük renema mali ta shiogo.
Taoba mapangtem nung Bhutan-i India den yaritepa par linük nungi United Liberation Front of Asom (ULFA) aser National Democratic Front of Bodoland (NDFB) ama telungpur teloktem aridoka liasü.
Iba dak alia taoba mapang arrtsülen NDFB telungpurtemi Bhutan nunger aika tepsetogo.
Rijiju-i, “Akhümtsübua aliba Bhutan Ato kilonserji ajemalu aser mangdang aliba lenir ka, pa den senden amenba atema pa dang pelar. India atema inyaktsü pa nükjidong lir aser Northeast India den tesentaktep yanglutsü tebilemba lir,” ta metetdaktsü.
“Bhutan ajangdanga gari lenmang agi Tawang o Assam sentakteptsü atema ni onük süoka jembi,” ta paisa ashi.
Rijiju-i Bhutan Army tongti, Batoo Tshering ajurudang pa den Indo-Bhutan arrtsü nung aser sensotem nem security agütsütsü atema o lemtepa liasü.
“India-Bhutan tembar tesentaktepji balaka, koba ajanga Northeast India ajangzüktsü,” ta Rijiju-i ashi.
Bhutan Ato kilonserisa twitter ajanga, “Tanü nikongdang India’er MOS of Home Affairs, Kiren Rijiju den onük aika nung jangratema o lemtepogo,” ta ashi.