India businessman ka nem Ghana nung tetushi agütsü

Accra, March 30 (Agencies) : India nunger Ghana nung alir businessman Ramchand Mohinani-i Africa linüktem nung business tsütsü mapa tulu inyaktetba ajanga University of Ghana-i pa nem ‘honorary doctorate degree’ agüja tushiogo.

Iba degree agütsüba sentong nung university-i, “Mohinani-i kanga meranga inyakba ajanga business inyakyim tsütsü takok tulu bener aruba den külemi linük nung rongsen kettsüng tsütsü terenlok bener aruba asoshi iba tetushi agütsür,” ta metetdaktsü.

Par jabaso, Ashok-i, kübo Ramchand March 8, 1935 nü Hyderabad, India nung aso aser tebo tanubo indang business nung repa inyaktsü atema 1954 küm Ghana nung mezüng arua alitsü tenzük, ta IANS dang ashi.

Iba sülen pai pa nija business inyaktsü tenzüka. Pai kanga meranga inyak aser kodanga tesülen meyipa mereprang.

“1960 küm nungi pai Ghana nunger businessman ka den lokteper süoshi, tsüngsem aser polythene osettem ayoktsü tenzük. Tena küm trok külemi inyakba sülen 1966 küm tena pei pei lenmangi ao, ta Ashok-i ashi.

Tangbo iba company ajanga nanglong tapu balala, sapon, chiyutsü aser tajemtsü tapu aika yanglua seper ayoker. Item chiyongtsü aser oset asepba pongdang temji linük nung ‘agro-processing industry’ atema amshir.