India, China-i kiralongra indang jembi, saka NSG atema mejembi

New Delhi, November 05 (Agencies): India aser China nati high-level senden ayonga maneni kiralongra anema raratsü aser tanga onüktem atema inyaktsü, ta metetdaktsü.
Linük anaprong nungi National Security Advisors- Ajit Doval aser China NSA Yang Jiechi na yashi Hyderabad nung senden ka menogo, ta tanü ketdangsertem sangdong ka ajanga metetdaktsü.
Ministry of External Affairs-i sangdong ka ajanga, linük ana tsüngda tesentaktep onük, regional aser International onüktem nung o lemtetogo, ta metetdaktsü.
Taoba ita ana tsüngda Yang-i tang agi tasembenbuba India semdangogo.
“Yimtenren, rongsenkettsüng, defence aser kiralongra anema raraba nung linük anati high-level senden maneni akatsü bangjemogo,” ta sangdong nungsa shia lir.
“Tenatisa kiralongra anema maneni taruba high-level senden nung jembitsü bangjem, aser ibaji kiralongraba atema alimai tayongzükba ajurudang linük anatia iba atema jembitsü bangjemer lir,” ta sangdong nungsa shia lir.
Ajisüaka  linük anati, India-i Nuclear Suppliers Group nung züngsem akumtsü benokba nung China-i nokdangba onük aser JeM tongti, Masood Azhar UN nem nokdangdaktsütsü atema India-i inyakba onüka jembir asü mejembiar iba atema official sangdong mali.
NSA Doval aser State Councillor Yang na ya China aser India arrtsü onük nunga Special Representatives lir, aser tenati sangküm India nung linük ana arrtsü atema 20buba Round of Special Representatives senden akatsü lemtetogo.