India-China nati social security tezüngzüktep atema bangjem

New Delhi/Beijing, Monupii 29 (Agencies): India aser China nati bendanglen India nunger mongintem aser aayangertem kümzüktsü atema social security tezüngzüktep agitsü atema ken o jembi tenzüktsü bangjemtepogo.
Monupii 28-29, 2018 anogotem nung linük ana tsüngda senden amenba mapang nung social security tezüngzüktep agitsü atema jembia liasü, ta China yimtiba, Beijing nung aliba Indian Embassy-i metetdaktsü.
Iba mapang nungji Ministry of External Affairs nung Joint Secretary (economic diplomacy & states division), Vinod K Jacob leniba nung India nungi lenirtem aser Deputy Director General, Ministry of Human Resources & Social Security, Ma Hezu leniba nung China nunger lenirtemi India aser China na nung social security inyakyim onük nung o lemtepa liasü aser tanga linüktem dena social security tezüngzüktep agitsü atema jembia liasü.
Iba dak sendakba nung China aser India linük na tsüngda shilem aika lemsar senden amentsü sentong renemogo aser mezüngbuba sendenji sangküm tenzüktsü, ta Indian Embassy osang ajangasa metetdaktsü.
Tang tashi nung India-i linük 18 den social security tezüngzüktep agia lir aser China dak alia Brazil, Russia, South Africa, Mexico, Peru aser Thailand linüktem dena social security tezüngzüktep agitsü atema tang tejembidak lir, ta kasa sangdong nung shia lir.