India-China tesendaktep ajanga region nung yimjung alitsü: PM Modi

August 29, 2025 nü Tokyo nung India-Japan Economic Forum senden nung Ato kilonser Narendra Modi aser Japan Ato kilonser, Shigeru Ishiba na den tongti ketdangsertem tangokba noksa nung angur.

New Delhi, Luroi/August 29 (Agencies): Hokolbarnü Ato kilonser, Narendra Modi-i, alima nung rongsenkettzüng jenjang tashi itta alitsü atema India aser China nati longjemer inyaktsüji kanga tongtibang, ta metetdaktsü.

Japan nung interview ka nung jembidang Modi-i, “Linük ana tsüngda (India-China) asalentong tsütsü tesendaktep aliba nungi teti atema tesendaktep tajungba akümtsü atema India-i melunga lir, aser ibaji külem akhümtsübutep aser külem tejangrabatem nung ajemdaker asütsüla,” ta metetdaktsü.

Paisa, kidanger linük ana aser alima nung nütsüng teimba aliba linük ana tsüngda tesendaktep tashi itta aliba ajanga region nung dang masü saka alima nunga yimjung aser azükaru atema inyaktettsü, ta ashi.

Tang ama mapang ka nung China den tesendaktep junga alitsüji tongtibang asü? ta asüngdangba langzüdang Modi-i, “Tir Xi Jinping-i jaokba ama ni yang (Japan) nungi Tianjin-i oa SCO Summit nung adentsü. Yaküm Kazan nung Tir Xi den ajurutepa senden amenba sülen linük ana tsüngda tesendaktep tajungba kümogo,” ta metetdaktsü.

Paisa, “Tang ama alima rongsenkettzüng tensa ka nung rongsenkettzüng tulu aliba linük ana ama India aser China nati alima rongsenketzüng jenjang tashi aittsü atema longjemer inyaktsüla,” ta metetdaktsü.

Tawa pai Russia Tir Vladimir Putin aser Ukraine Tir Volodymyr Zelenskyy na den phone ajanga jembiba dak sendakba nung pai, “Lenir anapronglai iba rara dak sendakba nung kü den parnok tebilemba lemsatepogo. Ni tenaprongla dang iba rara anentsü atema ken o jembitsü aser ketdangsertem tsüngda inyaksangshitsüji India tangatetba lir ta shiogo. Iba rara anena yimjung alitsü atema inyakba maparen nung India-i nungita yaritsü melunga lir ta ni shiogo,” ta metetdaktsü.