India-China tesendaktep yanglur küm 70 ajungba amongtsü renemer

Beijing/New Delhi, November 22 (Agencies): India aser China linük na tesendaktep yanglur küm 70 ajungba nüngtem nung sangküm benjung sentong 70 agitsü, aser item rongnung sobaliba, tamangba yimsü, shishilembaba ajungkettsüba aser military exchanges benjung densema lir, ta Hokolbarnü osang ka ajanga metetdaktsü.
Taküm October 11-12 anogotem nung Mamallpuran (India) nung Ato kilonser, Narendra Modi aser China Tir, Xi Jinping nati tanabuba Informal Summit nung bangjemba nung ajemdaker item sentong renemer.
“Item benjung sentongtem ajanga akhidang nungi linük ana tesendaktep aliba sayaba den külemi linük ana tsüngda küm aika tesendaktep tajungba akümba sayatsü,” ta tanü China yimtiba, Beijing nung Indian Embassy-i sangdong ka nung metetdaktsü.
Akhidang Tamil Nadu aser China kübok Fujian province na tsüngda shishilembaba tsütsü tesendaktep aliba nung ajemdaker parnoki akhidang tesendaktep aliba indang cooperative projects inyaktsü.
Linük anatisa longjemer border posts nung sobaliba sentongtem agitsü.
Shishilembaba tsütsü China-i India nung China-India Trade and Investment Cooperation Forum akatsü aser tanabuba China-India Drug Regulation sentong agitsü. Mezüngbuba forum sentongji China nung agia liasü.
Yaküm India aser China na tsüngda shishilembabaji US sen billion 95 liasü aser takümbo linük ana tsüngda shishilembabaji US sen billon 100 ajungtsü imlar.