India cricket telok July-August mapang West Indies nung oa asayatsü

New Delhi, April 30 (Agencies) : Board of Control for Cricket in India (BCCI)-i India aser West Indies na küm ka shi mangatettepi aruba timi angatetepba sülen, India cricket asayar teloki July-August itatem nung West Indies nung oa test asaya pezü asayatsü sentong lir.
“2014 küm West Indies India-i arua asayaba tembanga masayatet aoba ajanga mangatettep adoker aliba, BCCI aser West Indies Cricket Board (WICB) na tsüngda angatettepogo,” ta Honibarnü BCCI-i sangdong ka ajanga metetdaktsü.
“Iba tangatetba nung tarutsü mapang linük ka nungi ka nung oa asayatsü aliba sentongtem maneni aotsü aser iba sentong Indian cricket team-i tama West Indies nung oa asaya tenzüktsü,” ta sangdong ajangasa ashi.
“BCCI WICB den tesentaktep tajung yanglutetba asoshi kanga pelar. Cricket asaya tsütsü West Indies linük ya tongti linük ka lir aser parnok den nungitepa inyaktsü onoki pelar,” ta BCCI secretary Anurag Thakur-i metetdaktsü.
“Iba asaya tour aoba ajanga India aser West Indies sapurtem tsüngda tesentaktep tali tashi aitsü,” ta pai shisem.
WICB Tir Dave Cameron-ia iba terenlok tajung pela agizükba olen ka metetdaktsüogo.
“Onoki asaya tembanga masayatetba ajanga mangatettep adokba tsütsü India-i tangatetba tajung agi onoki den tesentaktep yanglushiba atema kanga pelar. India nungeri West Indies cricket-i nungitba atema kanga pelar ta ashiba mapang pai tan lemtetba asayamong nung pelatepa asayatsü imla atar,” ta shisem.