India den kanga meranga yangluba tesentaktep meraksai yuner:Xi

Deobarnü Hangzhou, China nung India Ato Kilonser Narendra Modi BRICS lenirtem den külemi tangokba noksa ka yangi angur.

Hangzhou, September 04 (Agencies) : China aser India nati kanga meranga yangluba tesentaktep tajung meraksatsü China-i mulunga lir aser maneni linük ana tsüngda amalitepa inyakner, ta Deobarnü China Tir Xi Jinping-i India Ato Kilonser Narendra Modi dang tena tebilemtsü kar atema olemtepba mapang ashi.
“Kanga meranga yangluba tesentaktep tajung meraksatsü mechi nung China-i India nunger den amalitepa inyakner,” ta ita asem nung lenir ana tsüngda senden tanabuba minute 30 agia amendang Xi-i ashiba China sorkar indang osangkaket, Xinhua news agency ajanga metetdaktsü.
Lenir ana ya G20 Summit jakdang akatsü aliba BRICS senden medenzü tsüngda ajurutepa item olemtep agia liasü.
India Nuclear Suppliers Group (NSG) nung züngsem akümtsü atema China-i mapang atsünglangtsüba, Pakistan nung aliba kiralongrartem UN nem zülutena agütsüba aser Pakistan-i amanglema aliba Kashmir (PoK) nung China-i sen billion dollar 46 alang China-Pakistan Economic Corridor yangluba tsütsülen nungi mangatettep adoker aliba mapang ka nung Xi-i India den amalitepa inyaktsü olen ya ashi.
Lenir ana ya taküm Tashkent nung June ita Shanghai Cooperation Organisation (SCO) Summit akaba mapanga ajurutepogo aser ano maneni taruba ita-a Goa nung BRICS (Brazil, Russia, India, China, South Africa) Summit akaba mapanga ajuruteptsü.
Asia linüktem rongnung tongtibang linük ana lenir ajurutepba mapang tenati Jaish-e-Muhammad lenir Masood Azhar tenüng UN nem agütsüba tsütsü tebilemba balala aliba lemsatep.
India aser US na tsüngda defence tsütsü tesentaktep yua linük ana sadem sadema kechisarena lemsatepa aser yanglushitsü atema Logistics Exchange Memorandum of Agreement (LEMOA) nung sign sütepba ajanga China kanga nükener.
Ato Kilonser Modi Hanoi anogo ananü semdangba sülen Honibarnü Hangzhou atong. Pai Australia Ato Kilonser Malcolm Turnbull aser Saudi Arabia Deputy Crown Prince Mohammad bin Salman na dena tesentaktep ayutsü atema jembiogo.
Modi-a “Strengthening Policy coordination & Breaking a new path for growth” omen kübok akatsü aliba G20 summit nung adentsü sentong lir.
Hombarnü G20 Summit tatembangba sentong nung dener Delhi-i meyipa maru tsüngda Modi-i British Prime Minister Theresa May aser Argentina Tir Mauricio Macri na dena India den tesentaktep tajungba ayutsü atema jembitsü.