India-England ODI:India-i wicket asem agi akok

Pune, January 15 (Agencies) : Tang India nung India aser England na tsüngda ODI asem asayatsü aliba asayamung mezüngbuba asaya Deobarnü Maharashtra Cricket Association Stadium, Pune nung asayadang Kedar Jadhav-i pa atema tanabuba One-Day International century yangluogo. Ibai international runs 100 tekaratiba yangluba pungbuba lir.
England nunger mezüngbuba batting asüba mapang parnok runs 351 yanglua yutsü. Anungji India-i ibaji menepa asayatsü merangdang Shikhar Dhawan aser Lokesh Rahul na kanga kara out süatok aser Yuvraj Singh-ia tera junga asayatsü tenzük ajisüaka runs aika meyanglutet.
Wicket-keeper aser batsman, MS Dhoni-a runs 6 ang yanglur out asü. India nunger nisung 4 tashi out sür runs 63 ang yangluteter aliba mapang Jadhav aita kanga junga asayatsü tenzük.
Pai ball 65 nung four 11 aser six 2 züka pa atema tanabuba ODI century yanglua India nunger cricket asayar rongnung runs 100 tekaratiba yanglur nisung pungububa kümogo. Pai ball 76 nung runs 120 yanglua yutsür out asü. India bowling asüba mapang nunga Jadhav-i over 4 aonba nung runs 23 ang agütsü. Wicket pungu buba out asüdang Virat Kohli aser Kedar Jadhav na senteper runs 200 yanglu.
India nungeri ball 11 anünga lia England-i yangluba runs menepa ODI asaya rongnung runs timtiba pezübuba menepa asayatetba ajanga wicket 3 agi takok angu.