India film nokdangra Pak Film Industry takoksa tulu angutsü

Lahore, September 28 (Agencies): India aser Pakistan linük tesentaktep tamajungba küma Pakistan nung Bollywood film tem nokdangra Pakistan Film Industry shishilembaba nung shilem 70 takoksa angutsü, ta Atrium chain kibur, Nadeem Mandviwalla-i ashi.

“Ni teimla makai mejembiner, saka ochiji- tesüiba küm ishika nung Pakistan nung cinema industry jenjang ajungbaji Bollywood aserHollywood film tasentem sayaba ajanga lir. Tesentaktepji mapang talangka mejungi malitsü ta ni imlar. Mapang tatsüka atema dang nokdangra (India films) onoki taküm litettsü, saka teti atema nokdangra cinema hall aser multiplexes aika shibangtsü,” ta exhibitor, distributor aser Atrium chain kibur, Nadeem-i ashi.

Ano film critic, Omair Alavi-ia, cinema screens aser saru timba akümba ajanga Pakistan nunger film industry asentenshiogo, ta ashi.

“Onoki Pakistan nunger film sayaba aser takok anguba nguogo, aser ano sayatsü lir. Ajisüaka cinema industry ka taküm alitsü atema küm ka nung tajemba agi film 50 nungi 60 tsüngdabosa sayatsüla, aser tang-tangbo onoki yamaji mesüteter,” ta Omair-isa ashi.

Mandviwalla-i, film industry shishilembaba shilem 70 bo Bollywood aser Hollywood ajanga lir, ta ashi.

“Tanga lenmang mali. Tesentaktep  (India-Pak) tamajungba kümra ibaji ajanga ajak kongshitsü,” ta paisa ashi.

Ano film industry nung inyaker Saleem Khan-ia, “Küm piyong sayutsü atema onoki film peria madokdaktsüteter. Küm shia onoki tajemba agi film 50 bosa adokdaktsütsüla,” ta ashi.