India football team Nepal den friendly asayatsü

May 17, 2017 (Agencies): Visa dak sendakba tetsükdaktsü aliba ajanga Lebanon den friendly asayatsü aliba athiba sülen India team June 6 nü Mumbai nung Nepal den asayatsü.
India aser Lebannon na Mumbai Andheri Sports Complex nung June 7 nü asayatsü liasü saka parnoki yashi All Indian Football Federation dang par linük nungi asayar bendanglen asayartem visa apply asütsü atema Beiut-i marutettsü ta metetdaktsü.
India sorkar temzüng nung Lebannon nungertem India-i aruba sülenbo visa magütsütsü ta zünga lir.
Aji saka Nepal-i India den asayatsü asoshi molungogo. Iba asaya kasa tesem nung dang asayatsü saka anogo dang melenshir June 6 nü asayatsü.
AIFF-i All Nepal Football Association dang India den friendly asayatsü asoshi asüngdangba sülen parnoki molungogo, ta parnok official website nung agütsü.
“Nepal teburtem telok India national team den Mumbai nung June 6 nü asayatsü,” ta parnoki metetdaktsü.
“Iba asaya ya telok anaprongla atema tajangzük asütsü, kechiyong telok anaprongla AFC Asian Cup 2019 qualifier atema renemshiba asaya ka ama asütsü,” ta kasa osang ajanga metetdaktsü.
AFC Asian Cup 2019 qualifier nung Nepal June 13 nü Yemen den Nepal nung asayatsü aser India nungera kasa anogo nung Kyrgyz Republic den Bengaluru nung asayatsü.
2015 küm December ita South Asian Football Federation (SAFF) Championship nung asayadang India-i 4-1 agi Nepal madak takok ngua liasü.