India, France nati Human space mission atema senteper inyaktsü

Bengaluru, Rongjui/September 06 (Agencies): Space atema amalitepa aliba jenjang ajungketa tanü India aser France nati ISRO indang mezüngbuba human space mission, Gaganyaan atema senteper inyaktsü tezüngzüktep ka agiogo; iba project atema linük anati working group ka tentetogo.
Iba tezüngzüktep nung ISRO-i France nung aliba space hospital facilities angutsü aser linük ana nungi space agencies-i space medicine, astronaut health monitoring, life support, radiation protection, space debris protection aser personal hygiene systems atema amalitepa inyaktsü, ta French space agency Tir, Jean-Yves Le Gall-i metetdaktsü.
2022 küm matongdangsa India-i nisung asem space-i yoktsü sentong lir.
Indian Space Research Organisation indang mission ji tejangja, kechiyong ibaji ajanga nisung mener space-i yoktetba linük pezübubaji India asütsü. Space-i nisung mener yoktetba linük asemji Russia, US aser China lir, iba sülen linük pezübubaji India asütsü nükjidong yur inyaker.