India government-i Naga yimten shitak latettsütsü imlar: NTC

Kohima, August 08 (TYO): Naga nungertemi aginüba ama, Naga yimten tebilemtsü latettsü merangba mapa nung ya Naga nunger yimten nüchiso bushir telok ajak dena telemtetba agitsü imlar, ta Naga Tribes Council (NTC)-i metetdaktsüogo.

Koba ama yimten telemtetba kati Naga nunger yimjung nung litettsü aser koba ama telemtetba katibo Naga nunger timtem lendongiang anitsüar, itemji NTC-i angateta aliba agi, Naga nunger linük tenzüker telok trok külemi longjemer Naga National Political Groups (NNPGs) akümba asoshi pelar, ta NTC-isa ashi.

Asenoki yimjung asoshi jembi shia meputepba kümli asür saka tangbo puteptsü nunga Naga nungertemi mapa agi sayua longjemtetogo, iba jagi Naga nunger nem teimla tasen ka agütsüogo, ta parnokisa ashi.

Iba ama linük tenzükertem telok trok tashi longjemtetba agi, iba tashiji bener India government ajuruogo aser iba mapang Naga yimten tebilemtsü tatem küma latettsü asoshi NNPGs dena külemi ken o jembir latettsüla ta India government dang shiogo. Iba kasa tangatetba nung India government-i inyakdagi ta angashia kanga pelar, ta NTC-isa metetdaktsü.

Iba denji ano kasa tangatetba nung teti asoshi Naga yimten tebilemtsü ya koka tatembang telemtetba kati arutsü nükjidong nung Nagaland GBs Federation purtemi Delhi tashi orr Ato kilonser ajurua tezüluba nung dena agütsüba asoshi parnok dang kanga pelar, ta NTC-isa metetdaktsü.

Goanbora-temjiang sobaliba benshir aser wazüka ayurtem lir, parnokiang Naga nunger asoshi tajungtibaji meteta lir, anungji parnoki ashibaji India government-i süoki ia angatsü imlar.

Naga nunger lokti tentettem aser tangatettertem aikati pei tangatetba ken o India government dang peria shiogo, anungji item nungji ajemdaker, India government-i telemtetba shitak agitsü imlar, ta NTC telokisa metetdaktsü.