India Hockey asayar telok Olympics atema apusogo

Bengaluru, July 24 (Agencies) : India hockey tebur telok Deobar anepdang Madrid-i apusoa ogo aser yangji parnok Spain den friendly match ana asayar külen Rio Olympics-i aotsü.
“Olympics matongdang yongi onok yamai nungita yariba angudang temulung nung kanga kongshir. Iba ya ajanga onok tali ajungmesor,” ta captain P.R. Sreejesh-i ashi.
“Madrid nung oa onok renemshitsü maongka angutsü imlar. Onok Madrid nungi July 29, 2016 nü Rio-i apusoa aotsü. Asayartem ajak kanga teyakyak dang lir anungji onoki kanga junga renemshir asayamung nung asayatsü,” ta pai ashi.
Asayamung tulu nung asayatsü atema India Hockey telok ya India nung anogo ter nü tashi kanga meranga training agiogo.
“Iba telok dak temulung lemtsü keta lir aser ibaji mapa küma sayutsü mapang tongogo,” ta Madrid-i mapuso tsüngda chief coach Roelant Oltmans-i ashi.
“Brazil nung anogo shia onok tajungtiba agi asayatsü nungdaker. Ibaji inyaktet nungbo medal angutsü,” ta pai ashi.
Parnok apusoba mapang Hockey India-i Lalit Hotel nung parnok kanga tushia minoktsü. Süngojemba sentong ajak Hockey India CEO Elena Norman, Hockey Karnataka chief S.V.S. Subramanya Gupta aser Hockey Bengaluru general secretary Kannan Krishnamurthy nungeri ketdang asü.