India-i 2buba ODI kokogo

Mount Mauganui, Aenjeti/January 26 (Agencies): Honibarnü Mount Maunganui, Bay Oval nung India aser New Zealand na asaya India-i run 90 agi koka linük ana tsüngda ODI pongu asayatsü aliba India-i 2 bo kokogo.
Kuldeep Yadav, shibai Napier nung mezüngbuba ODI asaya nung wicket 4 agi liasü, pai tanabuba ODI nunga run 45 agütsür wicket 4 agia liasü. Asaya nung mezüng bat asüba sülen India-i wicket 4 out sür run 324 yanglu aser parnoki New Zealand pur over 40.2 nung run 234 yanglur ajak out sütsü.
Bat asütsü pitch kanga dang tajung ka nung New Zealand batsmen parnok trok pronglai run 325 arishitsü tenzük, ajisüaka parnoki partnership tajung meyangluteti out süma.
Asaya nung Yadav-i New Zealand pur middle order tem; Tom Latham (34), Colin de Grandhomme (three) aser Henry Nicholls (28) nunger kara kara out sütsü aser iba ajanga parnok run arishiba nung timtem tulu agütsü.
Arishi küm 24 asaya yagi one-day international hat-trick tanabuba angutsü maongka ngua liasü. Pai Nicholls aser Ish Sodhi na atonga out sütsü saka Lockie Ferguson out mesüdaktsütet.
New Zealand pur batsman tem rongnungi all-rounder Doug Bracewell-i pa asaya nung renloka aoba sayua run 57 yanglutet, koba pa asoshi mezüngbuba ODI half century liasü.
Indian nunger batsmen tem rongnungi opener Shikhar Dhawan-i run 66 aser Rohit Sharma-i run 87 yanglu. Opener anaprongla ya over 30buba tatemi out süadok aser iba mapang nung parnoki run 172 yanglur liasü.
Iba sülen New Zealand bowler tem run yangluba ajemdaktsütsü asoshi parnok line aser length melenshia aonba den tasa balala asaa ball aon, akisüaka India nunger batsmen temi tanem tanemi run yangluyonga ao aser run 300 adena yanglutet. Asaya over tembangba mapang nung Mahendra Singh Dhoni (48 not out) aser Kedar Jadhav (22) na batting süa liasü. Tenati tatembangbuba over ana nung run 35 yanglu.
Asaya tasembuba ya Bay Oval nungsa Hombarnü asayatsü.