India-i 3-1 agi Canada madak takok angu

Ipoh, April 10 (Agencies) : Deobarnü India hockey team-i 3-1 agi Canada team madak takok anguba ajanga tan Sultan Azlan Shah Cup asayamung nung India-i temaba jenjang asembuba tongteta lir.
India-i iba jakdang world champion Australia 1-5 agi makok.
Ajisüaka Canada team denbo tenzüker minute asembuba nung Rupinder Pal Singh-i Ramandeep Singh nem agütsüba pass ka forward asayar Nikkin Thimmiah nem agüja pai tanema zükokja India atema mezüng goal yok. Iba sülen Chinglensana Singh-i goal ka agütsütsü merangdang ajisüaka Canada goalkeeper-i kanga jung kümzük. Canada team-i asaya tanabuba tesadang nungi kanga meranga asayatsü tenzük aser asaya tenzüker minute 23 buba nung Canada nungi Keegan Pereira-i goal ka yokba ajanga India den 1-1 aküm.
Iba sülen India team-i Canada nem goal yoktsü maongka khenyongi magütsüi asayameso.
Asaya tasembuba quarter tenzüker minute 10buba nung India penalty corner ka angu. Iba Penalty corner agidang Harmanpreet Singh-i goal yok, aji asaya tenzüker minute 41buba nung liasü. Iba sülen forward asayar Talwinder Singh-i asaya tembangtsü minute asem lia goal ka yokba ajanga India-i Canada madak 3-1 agi takok angu.
Iba takok ajanga India point 6 kümogo…Canada dang point ana agi timba, aser Australia temaba jenjang nung lir.