India-i 3-1 agi S Korea madak tetsür hockey series kokogo

Seoul, Metsüremi 11 (Agencies): India aser South Korea tetsürtem tsüngta match pongu hockey asayamung tatembangba Amungnü (Sunday) Jinchun National Athletic Centre nung asayadang telok ana tsüngta 1-1 nung tembang.
Iba asaya final quarter nungang telok anaprongi goal kaka agütsütet.
Asaya tenzüker minute 48buba nung India tsür Vandana Katariya-i goal ka idaktsü, saka iba tepela ya mapang tatsüka atema dang liasü, kechiyong minute 50buba nung Bomi Kim-i South Korea atema goal ka yokteta telok ana tsüngda goal kasa kümadok.
Mezüngbuba quarter asaya tenzüker külen telok ana tsüngda asayaba yimyatem puteba aser kanga dang ajemalua asaya liasü.
Asaya tanabuba quarter nung Korea teloki maongka tajung yanglu aser World No. 9 nung alir, Korea tetsür temii aoksadang India telok ‘striking circle’ tsütsü kanga meranga asaya. Iba mapang South Korea-i penalty corner ana ngua liasü, saka Indian goalkeeper Rajini Etimarpu-i Penalty Corner anaprongla kanga junga nokdangtet.
Half-time sülen India tsürtem kanga asentenshia asaya tenzük. Parnoki tekeraba aser kanga teindangba nung ball ji amshia asaya. Minute 41buba nung World No.10, India team-i iba asaya nung mezüngbuba penalty corner ka ngutett. Ajisüaka South Korea goal keeper, Mijin Han-i iba corner kanga junga nokdanga tanabuba quarter 0-0 nung tembang.
Iba asaya tatembangbuba quarter minute 48buba nung Vandana Katariya-i goal ka inokja India telok 1-0 agi tejaklen liasü. Ajisüka minute 50buba nung Bomi Kim-i South Korea atema goal ka idaktsü aser ibaji ajanga telok ana tsüngda goal 1-1 kümadok.