India-i 5-0 agi Chinese Taipei kokogo

Intercontinental Cup 

Mumbai, Aami (June) 2 (Agencies): Intercontinental Cup asayamung mezüngbuba asaya nung India team-i 5-0 agi Chinese Taipei kokogo.
India captain Sunil Chhetri-i yasüng hat-trick tasembuba agütsüogo aser India nunger iba asayamung kanga junga tenzükogo, ajisüaka chief coach Stephen Constantine-i asayartem dang iba takok ajanga angaka maotsü atema shiogo, kechiyong parnok team tashi tait tem den asayatsü anüngdaka lir.
“Onoki taoba küm asemser tesadang asaya aruba nung asaya karbo kanga junga asayaogo. Ajisüaka tanü onoki asayanüba ama ajak junga asayaogo. Asayartemi parnoki akokba tashi tajungtiba agi asaya. Lanur asayartemi kanga junga asayaogo aser iba atema ni kanga pelar,” ta Constantine-i ashi.
India team Tentonü Kenya dena asayatsü aser iba ya Chhetri atema international asaya 100buba asütsü.
Asaya tenzükli nungi Indian National Team-i kanga junga asaya tenzük aser minute asembuba nung Udanta Singh-i ball kangajunga Sunil Chhetri nem pass agütsü saka Chhetri-i ball tezüleni metsüdok.
Ajisüaka minute 14buba nung Sunil Chhetri-i India nunger atema mezüngbuba goal idaktsü. Iba sülen minute 19buba nung Anirudh Thapa ball pass asüba Chhetri-isa kangajunga idaktsü aser asaya mezüngbuba shilem goal 2-0 nung tembang.
Asaya tanabuba shilem tenzükba sülen minute 48buba nung Udanta Singh-i goal tajung ka idaktsü aser score 3-0 aküm.
Asaya nung India nunger goal idaktsütsü asoshi maongka ngua aru saka goal magütsüteti aliba mapang minute 60buba nung corner kick ka metsüba sülen Chhetri-i pa atema goal tasembuba aser pa telok atema 4buba idaktsü.
Iba sülen Pronoy Halder-i minute 78buba nung India team atema goal pongububa idakja parnoki iba asaya ayong ayonga kokogo.
Iba asaya nung Coach Constantine-i Subhashish Bose Ashique Kuruniyan aser Alen Deory nunger nem International jenjang nung mezüngbuba asayatsü asoshi maongka agüja asayadaktsüogo.