India-i Africa nung Mahatma Gandhi Convention Centres aika amenoktsü

Gandhinagar, January 19 (Agencies): Tanü Gujarat kübok Gandhinagar yimti nung External affairs minister, Sushma Swaraj-i, Mahatma Gandhi sor küm 150 ajungba nüngtem nung India-i Africa nung aliba linüktem nung Mahatma Gandhi Convention Centres amenoktsü, ta metetdaktsü.
Africa Day sentong VGGS 2019 nung jembidang lai Mahatma Gandhi aser Nelson Mandela (yaküm centenary amongba) na tenüng tetshi.
“Asenok Gujarat li nung lir- state-i asenok nem Mohandas Karamchand Gandhi agutsü. Mahatma agutsübaji Africa continent lir,” ta lai ashi.
VGGS putiotsü nung Swaraj-i tama Africa Day semzüktsü. Iba sentong nung Gujarat Chief Minister Vijay Rupani aser deputy Chief Minister, Nitin Patel na den minister 6 aser Africa nung aliba linüktem nungi secretaries liasü.
Swaraj-isa, 2017-18 küm India aser Africa na rongsenkettsüng tesendaktepji US sen billion 62.66 liasü, aser ibaji iba küm jakdang nungi shilem 22 agi timba lir, ta metetdaktsü.
“Africa linüktem dangi export asüba jenjang tasembuba nung India lir. Junga merenlokba linüktem atema saru magiba scheme ajanga shishilembaba jenjang tajungba kümogo, kechiyong Africa linük 38 Duty-Free Trade Agreement (DFTA) ajanga tajangzük nguogo,” ta lai metetdaktsü.
Laisa India Tir, tatong Tir aser Ato kilonseri tesüiba küm pezü nung Africa 29 ben semdangogo aser kasa mapang nung India-ia Africa nungi lenir 35 agizükba den India-Africa Summit mapang Africa nung sorkar tongti lenir 41 agizükogo, ta metetdaktsü.
“Asen tesendaktep ulushia onoki Africa nung Embassies mesüra high commissions tasen 18 amenoktsü lemtetogo, ajak senteperbo 47 asutsü,” ta lai metetdaktsü.
Laisa Africa linüktem dang kiralongra anema raraba, loktiliba-rongsenkettsüng terenlok aser yimtenren nung amaliteptsü mepishi.