India-i amsang nung amshiba ‘potassium bromate’ noktanger

New Delhi, June 20 (Agencies) : Centre sorkari Hombarnü ‘potassium bromate’ ta ajaba food additive mamshitsü tenoktangba agütsüogo.
Centre for Science and Environment (CSE) study ka ajanga amsang (bread) nung potassium bromate enokba ajanga cancer adokdaktsür ta bushitetba sülen sorkari iba telemtetba agiogo.
“FSSAI-i potassium bromate noktanger. Iba dak sendakba nung tetuyuba ka agütsüogo. Ano amsang nung amshiba potassium iodate bushisüngdangtsü atema scientific panel ka nem agütsüogo” ta Food Safety Standards Authority of India (FSSAI) CEO, Pawan Kumar Agarwal-i ashi.
CSE-i India nung ayokba amsang tapu 38 nung potassium bromate aser potassium iodate amshiba bushitet. Iba food additives ana ya linük aika nung noktanga lir aser public health atema ‘lendong keta lir’ ta züngshir.