India-i April 28 nü navigation satellite tatembangba kahkettsütsü

Chennai, April 19 (Agencies) : India-i linük atema tenetbuba aser tatembangbuba navigation satellite April 28, 2016 nü anünglak nung kahkettsütsü aser ibaji ajanga anünglak nung India atema ‘navigation system satellites’ peritsü, ta space agency ketdangser tain kati ashi.

“Iba satellite ya April 28 nikongdang kahkettsütsü. IRNSS-1G (Indian Regional Navigation Satellite System-1G) ya Polar Satellite Launch Vehicle (PSLV), rocket ajanga kahkettsütsü,” ta Indian Space Research Organisation (ISRO) indang Vikram Sarabhai Space Centre nung dirtector Vikram Sarabhai-i Mongulbarnü phone ajanga metetdaktsü.

PSLV rocket ya April 28 nü 12:00 ako nung Chennai nungi kilometre 80 shi pilar Sriharikota, Andhra Pradesh nung aliba spaceport nungi kahkettsütsü.

Tang tashi nung India-i anünglak nung navigational satellites trok (6)—(IRNSS-1A, 1B, 1C, ID, 1E aser 1F) kahketja lir. Tang kahkettsütsü aliba satellite dena item navigational satellite tenet agi constellation ka ajunger aser ibaji ajanga linük nung aliba nüburtem nem kilometre 1,500 telungtet nung aliba tesem balala indang osang tejangja agütsütsü.

Anünglak nung tenet aser ali nung kodang masüdang kahkettsütsü atema kasa satellite ana yua aliba zünga India nunger indang navigation satellite toku (9) lir, ajisüaka satellite pezü kija agia nüngdakba osang agütsütettsü, ta tamalen ISRO ketdangsertemi metetdaktsüogo.

Satellite ka yanglutsü asoshi sen crore 150 aser PSLV-XL rocket ka yanglutsü asoshi sen crore 130 aoer. Anungji Rocket tenet kija nungji sen crore 910 intokogo.