India-i ASEAN lenir 10 den 69buba Republic Day mongogo

New Delhi, Aenjeti (January) 26 (Agencies): Rogonü (Hokolbar) India linüki ASEAN linük 10 nungi lenirtem den 69buba Republic Day benjungmong mongogo.
Tanü linük yimtiba, Delhi nung tzüsü kanga melema liasü, ajisüaka Rajpath nung nisung kanga longsoa adenshia ‘march past’ reprangogo.
Tanep linük Tir, Ram Nath Kovind-i Rashtrapati Bhavan nung linük wako atsüket aser Ato kilonser, Narendra Modi-i India Gate anasa aliba Amar Jawan Jyoti nung linük atema taküm tenla agüja asür sepaitem nem akhüm agüja liasü.
Republic Day sentong nung Ato kilonser, Modi-i Asean linük 10 nungi tetushi tejaokertem (lenir 10) sabangi jaket. Sabang nungsa Tir, Kovind aser Union Defence Minister, Nirmala Sitharaman na densema sorkar tongti ketdangsertem aika mena liasü.
Sentong nungsa Army indang T-90 tank (Bhishma), Ballway Machine Pikate (II/IIK), Brahmos Missile System, weapon locating radar (Swathi), bridge laying tank T-72, mobile base transceiver station aser Akash weapon system sayaa liasü.
Ano BSF officer tetsürtemi 350CC Royal Enfield motorcycles nung mener ‘acrobatics’ aser ‘daredevil stunts’ saya. Ano Light combat aircraft Tejas, Jaguars aser MiG-29 tayimtsütem-i anüng nung ‘formations’ balala yanglua sayaa liasü.
Parade nung shilem agirtem rongnung National Bravery Award angur tanurtemia shilem agiogo. Military parade ji General Officer Commanding, Headquarters Delhi Area, Lt. Gen. Asit Mistry-i command süa liasü.