India-i Bang’desh nem sen bn 2 aputsütsü

New Delhi, March 10 (Agencies): India-i Bangladesh linük nem US sen billion 2 aputsütsü, aser ibaji linük ka nem sen timba aputsüba lir, ta Brihostibarnü sorkari metetdaktsü.

2010 küm nunga India-i kidanger linük, Bangladesh nem sen billion 1 apuja liasü.

Tanü New Delhi nung osangbenertem den jembidang External Affairs Ministry otongdar, Vikas Swarup-i, “March 9, 2016 nü Dhaka nung   Exim Bank of India Chairman & Managing director aser Bangladesh, Ministry of Finance, economic relations department secretary na tsüngda sen billion 2 aputsütsü tezüngzüktepji agiogo,” ta ashi.

2015 küm June ita nung Ato kilonser, Narendra Modi-i Bangladesh yimtiba, Dhaka semdangba mapang iba tezüngzüktep agitsü atema sangdonga liasü.

Swarup-isa, iba tezüngzüktep agiba ajanga sector balala nung project tem tenzüktsü atema lenmang lapoktsüogo, ta ashi.

“Terenlok project tem, dak alia anema-alibaren tsütsü social sector nung amalitepa inyaktsü, iba nungji medical college aser hospital den shisaliok reju amenoktsü densema lir, aser item kübokji teacher training institutes ana aser polytechnic institute 49 jenjang tajungba kümtsütsü,” ta paisa metetdaktsü.

Pai ashiba agi, item mapatem ajanga India aser Bangladesh na rongsenkettsüng nung tesentakatep ano tali tajungba akumtsü.