India-i black money anema raraba nung yaritsü: Switzerland

New Delhi, September 02 (Agencies): Switzerland Tir, Doris Leuthard-i, India-i black money anema raraba nung Switzerland-i osangtsüsang lemsatepba ajanga yariteptsü, ta metetdaktsü.
Hokolbar aonung New Delhi nung aliba Swiss Embassy nung India aser Switzerland na tsüngda tesendaktep yanglur küm 70 ajungba sentong ka amongba sülen lai iba osang ya metetdakja liasü.
Leuthard-i, “India ya tembar tajung ka lir. Küm 70 tsüngda linük anati kati ka ashiba angaa aruogo, sayutsüngitepogo aser linük ana tsüngda angazüktepogo. Ibaji tajemdakdak ser tang linük ana iba jenjang nung nokdaka lir,” ta ashi.
“India-i black money anema raraba nung Switzerland-i osangtsüsang lemsatepba ajanga yariteptsü, aser iba atemaji taküm Parliament nung agizüktsü onoki atadar,” ta laisa metetdaktsü.
Lai India anogo pezünü atema semdang, aser iba mapang nung lai Ato kilonser, Narendra Modi den onük aika nung o lemtepa liasü, aser item onük rongnung black money anema raratsü dena liasü.
Linük ana tesendaktep yanglur küm 70 ajungba benjungmong ya 2018 küm tashi amongtsü.
Iba benjungmong dak sendakba nung Leuthard-i linük anaprongla nungi aika nem “Friendship Ambassador” tetushi agütsü.
Linük ana tesendaktep dak sendakba nung lai, India nung Swiss company 250 amenoker inyakdar aser India nunger company 140 Switzerland nung amenoka lir, ta metetdaktsü.
“Linük ana tsüngda shishilembabaren kanga indar aser ano sector aika nung asenoki senteper inyaktettsü, aser item sector rongnung railways, design, film aser tourism densema lir,” ta lai ashi.
“Tesendaktep tajung atema ni nenok dang pelar,” ta laisa shisem.
Iba sentong nung linük ana tesendaktep küm 70 ajungba nüngtem nung Switzerland nung maongka balala aser lar linük sobaliba indang film tatsü ana sayaa liasü.
Kasa sentong nung linük balala nungi ambassador tem, shishilembartem aser art sector nungia aika aden.