India-i Border-Gavaskar Trophy takoker

Sydney, Aenjeti/Jan. 04 (Agencies): Sydney nung tang tesaidak Border-Gavaskar Test cricket pezübuba aser tatembangba nung India temaba jenjang nung lir aser Australia madak mezüngbuba series akoktsü maongka nung lir.
Iba series nung India-i anaben aser Australia-i khen koka lir aser tatembangba asaya mezüng innings nung India-i wicket tenet out süa runs 622 yangluteter lia declare asü.
India nunger Cheteshwar Pujara ya runs 193 yangluteter lia out asü aser Rishabh Pant-i pa asoshi Test century tanabuba yangluteta runs 159 (not out) tongtet.
Ravindra Jadeja runs 81 yangluteter lia out asüba sülen India nunger captain, Virat Kohli-i asaya tembangtsü ghonda ka lia declare süa liasü. Iba sülen Usman Khawaja aser Marcus Harris nati Australia ya 24-0 tashi anir tua lir.
India nungeri Australia nunger Khawaja indang wicket ya agiteter alitsüsa maongka ngutet, saka Mohammed Shami-i aonba ball nung pai kongshiba ya wicketkeeper Pant-i meputeti ali nung tsükdaktsü.
India nunger Pujara ya runs 139 yangluteter lia yashi asaya anen aser pai double century pezübuba yanglutettsü südi ta aikati imlaa liasü, saka ghonda 9 asaya ball 373 nokdangteta amenba sülen Nathan Lyon-i out sütsü. Iba series nung pai century asem tashi yangluteta lir.
Iba sülen Pant aser Jadeja külemi over 37 amenba mapang runs 204 yanglutet aser Pant-i ball 137 nung century yangluteta India nunger wicketkeeper rongnungi Australia nung mezüngbuba century yangluteter aküm.