India-i BRICS linüktem den kiralongra anema raratsü:VK Singh

Beijing/New Delhi, June 19 (Agencies): India-i BRICS linüktem- Brazil, China aser South Africa den külemi kiralongra anema raratsü lemtetogo.
Tanep China yimtiba, Beijing nung BRICS foreign ministers senden nung jembidang Minister of state for external affairs, V K Singh-i, “BRICS onüktem tanemtanemi tuluba kümdar. May ita nung kiralongra anema tentetba joint working group senden tembanga liasü. NSAs senden taruba ita amentsü. Yaküm parnok senden nung security aser kiralongra anema BRICS linüktem amalitepa inyaktsü asoshi telemtetba ka dangi arua liasü,” ta metetdaktsü.
Taküm September ita nung China, Xiamen nung BRICS senden amentsü jilia BRICS foreign minister tem senden ya menogo. BRICS senden nungji Ato kilonser, Narendra Modi-a adentsü sentong lir.
Foreign minister tem senden nung External affairs minister Sushma Swaraj adentsü sentong liasü, ajisüaka la temang manemi aliba ajanga la melen Singh aden.
Taküm May 14 nü India-i China Tir, Xi Jinping-i ayongba Belt and Road senden nung madenba sülen tang mezüng minister kati China nung ayongba senden nung adener.
Singh-i longjemer kiralongra anema raratsü atema jembi, ajisüaka pai Pakistan nungeri arrtsülen kiralongraba onükbo süoka mejembi. Ajisüaka India-i taküm September nung ayonga aliba BRICS senden nungbo iba onük süoka jembitsü sentong lir.
Kiralongra onük nung China-i Pakistan maneni pusemba agi India mepelar. UN Security Council nunga India-i kiralongra indang jembinüa liasü, ajisüaka China-i nokdang.
Ano taruba ita linük pongu nungi NSAs senden nung National Security Adviser, Ajit Doval adentsü sentong lir. Iba senden nung kiralongra aser security nung amalitepa inyaktsü atema jembitsü.
Tanep kasa senden nungsa China foreign minister, Wang Yi-ia, “China aser India naprong tashi aliba linük lir, anungji linük anati tesem nung yimjung alitsü atema BRICS aser Shanghai Cooperation Organization (SCO) nung amalitpa inyaktsüla,” ta ashi.