India-i Chinook aser Apache helicopter alizüktsü nangzüktepogo

New Delhi, September 28 (Agencies): India-i Hombarnü America nung Boeing company aser US sorkar den Apache attack helicopter 22 aser Chinook heavy-lift chopper 15 alizüktsü atema tenangzüktep agiogo.
Taruba küm asem-pezü tsüngda nung India ket nung mezüngbuba helicopter agütsütsü imlar.
“Apache 22 aser Chinook helicopter 15 alizüktsü atema tanü contract agitepogo” ta Defence Ministry otongdar Sitanshu Kar-i ashi.
India-i Apache helicopter atema Boeing den aser Chinook atema US sorkar den tenangzüktep agi.
Item helicopter alizükba nung US nunger sen billion 3 shi endoktsü ta osang angazüker.
Taoba hopta Defence Minister, Manohar Parrikar-i ashiba agi iba inyakyim noklang nung shilem 30 offset clause ajanga Indian defence industry atema USD 1 billion shi shishilembatsü maongka angutsü.
2005 küm Defence Procurement Procedure (DPP) nung Offset policy ya mezüng enoksem. Iba ya ajanga India-i shishilembatsü tenzükba agiba nung bendanger company katia India nung shilem ka shishilembatsü lemteta lir.
2013 nungi Apache aser Chinook helicopter tem alizüktsü atema jembia aru saka ibaji melemteti aruba sülen taküm September 22 nü Cabinet Committee on Security-i iba telemtetba agi.