India-i Dalai Lama pusemba taa angutsü: China

Beijing, April 21 (Agencies) : India-i China anema Dalai Lama pusemba manenra taa dalang angutsü, ta China osangkaket nung Hokolbarnü metetdaktsü.
“Dalai Lama asemba maparenji New Delhi asoshi shisa taka mapa ka masü. India-i iba asaya ya maneni asayara parnok kanga akoksatsü,” ta China sorkar indang osangkaket nung shia lir.
Ai Jun indang ocet nungji China-i Southern Tibet ta agiba Arunachal Pradesh tesem trok nem China nunger tenüng agütsüba dena shia lir.
“China-i India den ali tebilemtsü bentettsü kanga meranger, ajisüaka küm aika India-i tashishitep aketba ali nung migration aser military inyakyim manener,” ta iba osang zülusangi zülua lir.
“China anema India-i Dalai Lama-a parnok hadir pongdang nung inoka lir aser ibaji New Delhi indang tasa tasentem rongnung ka lir. Dalai Lama-i ashiba ajanga dang pai amangbaji India asoshi dang lir ta mebilemtsüla. India-i parnok tebilemba nem parnok nembanga yudaktsür China den tashi tokteptettsü mebilemtsüla. Tashi uluba ajanga dangbo linük ali tebilemtsü mebentettettsü, mesüra Beijing-i New Delhi den mener mangatettepla,” ta kasa osang nungji shia lir.
China-i kechiba South Tibet tesem trok nem China tenüng agütsü ibaji India-i kanga junga shisadangtsü mapang tongja tongogo, ta China-i ashi.
Dalai Lama Arunachal Pradesh-i aruba aser India sorkari Tibet nunger tamang lenir aniokba ya China-i kanga anemer.
1959 küm par aliba tesem nungi jena aoba sülen nungi Dalai Lama ya India nung jenoka alir.