India-i football friendly match nung Puerto Rico 4-1 agi akok

Mumbai, September 04 (Agencies) : Honibarnü Andheri Sports Complex stadium nung India aser Puerto Rico na International football friendly match asayadang India-i 4-1 agi takok angu.
Asaya tenzüker minute 7buba nung Puerto Rico nungi Emmanuel Sanchez-i India nem mezüng goal agütsü, ajisüaka India nungeri temulung ajema mekümi parnok dang nungi jenjang 38 agi tajungba telok, Puerto Rico dang tajungba asayatsü tenzük.
Asaya mezüng tesadang nung India 3-1 liasü. Item goal asemji Narayan Das (min18 buba nung), Chhetri (min 26 ), Jeje Lalpekhlua (min 34) aser Jackichand Singh (min 58) nungeri yokbatem lir.
Iba saya nung Gurpreet Singh Sandhu nem captain asütsü benloktsüsang, Chhetri-i iba sülen ano goal ka yoksema parnoki 4-1 agi akok.
Taküm March ita Kochi nung World Cup qualifier asayadang Turkmenistan den 2-1 agi tamakok aguba sülen tan takok anguba ya dena India nunger asayartemi pezüben buba atonga atonga takok angurba lir.
June ita Asia Cup qualifiers nung India team-i Laos madak 6-1 aser 1-0 agi takok anguba den taoba ita Bhutan den international friendly asayadang 3-0 agi akok.
Tesüiba mapangtem nung India football team-i parnok dang tajungba team aibenbo koka mali aser taküm January ita Kochi, SAFF Cup asayamong nunga India-i Afghanistan madak 1-2 agi tamakok angu.
Tan takok anguba ajanga linük football team coach Stephen Constantine kanga pelar alitsü.