India-i France dang nungi Rafale fighter jets 36 alitsü

New Delhi, September 24 (Agencies) : Hokolbarnü India-i Rafale fighter jets 36 alitsü atema France den sen Euro billion 7.87 (Rs 59,000 crore) tezüngzüktep ka nung sign sütepogo aser ibaji ajanga anüng nungi raraba tsütsü Indian Air Force (IAF) tali tashi itshitsü, balakata tang India den meputepi aliba Pakistan dang tashi sayutetsü.
India aser France Defence Minister tem, Manohar Parrikar aser Jean-Yves Le Drian, na tsüngda iba tayimtsü alitsü tezülutepba nung sign sütep. Iba fighter jet nung nuclear weapons bener yimtettsü.
Tawa tanü nüngdakba missiles aser raradang amshiba oset keta aliba fighter jet alitsü atema mapang agia jembiba sülen sen billion euros 7.87 nung tembang.
Iba tezüngzüktepba nung sign süzükli Parrikar-i, “India nunger anüng nungi raraba mapa aser defence nung tashi itshitsü,” ta tweet asü.
Iba tayimtsü alitsü ya tesüiba küm 20 nungi jembia aruba Ato Kilonser Narendra Modi-i yaküm April ita nung France semdangba mapang tezülutepba ka nung ayuba sülen ita 16buba nung mapa akümerba lir.
Item tayimtsü nung Meteor keta lir. Iba yagi tenük agi ayimjema manguba ngudaktsür aser ibaji ajanga anüng nung raradang IAF nem kanga tajangzük agütsütsü.
Osang ajanga ashiba agi iba tayimtsü nung aliba missile ji Pakistan nunger indang dang nungi khenyongi tajungba lir.
Tang alitsü sign sütepba Rafale fighter jet temji ita 36 nungi 37 tsüngda nung raradang amshiba oset, training nung yaritsü inyakyim den iba nung nüngdakba osettem aser Performance Based Logistics (PBL) nung yariba oset teperi keter atongtsü.
India-i kija amenba Rafale fighter jets 28 alitsü aser tanüngba jet temjibo nisung anana amenbatem asütsü.
Kija amenba tayimtsü nung oset kecha medeni tayimtsü tazüng kija nung sen million euros 91 alang lir aser nisung anana amenba tayimtsüji ka nung sen million Euros 94 alang lir.
Item tayimtsütem yagi India mapang balala nung atongsü. Mezüng anaji ita ishika tsüngda arua atongtsü.
2012 küm, United Progressive Alliance (UPA) sorkar aliba mapang India-i Rafale jets 126 alitsü lemteta ayu. Iba mapang India-i France dang nungi sen billion dollar 10.2 alang, iba tayimtsü terenem 18 alitsü aser tanüngbaji India nung yanglutsü sentong liasü.
Ajisüaka Modi April 2015 nüng France-i aoba mapang IAF atema iba tayimtsü 36 tekaratiba nung nüngdaker ta ashi.
India dang ayoktsü aliba Rafale tayimtsü ya tanga air force temi amshiba dang nungi tajungba lir kechiba süra iba tayimtsü nung radar, nisung kümzüktsü aser lendong putetba inyakyimtem tanga dang nungi tajungba keta lir.
Iba tezüngzüktep ya technology firm aser Dassault aviation nung Rafale züngsem, Thales-i mulunga agizükogo. Iba contracty ya ajanga mapa mangurtem Thales manufacturing sites nung mapa aika angutsü, ta sangdong ka ajanga metetdaktsü.