India-i France nungiter aser yaritsü : Kiren Rijiju

New Delhi, November 16 (Agencies): Kiralongrartemi Paris amakba sülen, France-i item lendong agütsürtem den raraba nung yaritsü aser iba ama lendong kecha nunga mataloki nokdangtsüsa inyaktsü, ta Hombarnü India-i metetdaktsüogo.
New Delhi nung aliba France Embassy nung lendong nung asürtem atema mangyimba sentong ka ayongzüka agidang, Union Minister Kiren Rijiju-i, India nungera iba ama lendong aser timtem agi kanga okrongogo, küm 40 tashi iba ama kiralongraba mapa agi sünga liasü, ta ashi.
Paris nung kiralongraba mapa atalokba dak sendakba nung, Minister of State for Home Kiren Rijiju-i, loktiyimten aliba linüktem amakba ya tebilemtsü khuret tulu lir, ta ashi.
“Iba ama mulungzürep mapang ka nung onoki nenok den shisabulu lemsateper aser France sorkar den külemi nokdaker iba rara nung yariteptsü aser tarutsü mapangtem nung iba ama lendong kecha nunga mataloki nokdangtsüsa inyaktsü ,” ta pai sentepa alirtem dang ashi.
Ato Kilonser Modi-i Turkey nung G-20 summit mapang, alima rangben ola ka ser shinga mebendangi kiralongrar telok ajak den raratsü mapang tongja tongogo, ta ashiba Rijiju-isa lepshia metetdaktsü.
“Asenoki kiralongrar nungitertem nungi pila alitsüla aser meimchir temeten asoshi inyakertem den külemi nokdaktsüla. Nübur temeten aser nüchi asoshi bilemba lokti yimten linüktem parnok ama kiralongrartemi kanga amokmerener,” ta pai ashi.
Pai, nübur nüchi anema inyaker teloktem nokdangtsü asoshi intelligence den amalitepa inyaktsü mapang tongogo, ta ashi.
“Alima nung kiralongrar nokdangtsü asoshi international inyakim kar ajanga tapu ajaklen nungi tekaratiba nung sentong balala yanglutsü nüngdaker. India-ibo iba ama inyakyim ya küm aika nungi nüngdaka jembia arur,” ta Rijiju-i ashi.