India-i goal 2 agi Japan kokogo

Ipoh, Metsüremi/March 23 (Agencies): Sultan Azlan Shah Cup hockey tournament mezüngbuba asaya nung India-i Asian Games champion Japan goal 2-0 agi koka asayamung kanga junga tenzükogo.
Asaya nung minute 24buba nung penalty corner ka ajanga Varun Kumar-i mezüngbuba goal idakja India tejakdang toktsü aser iba sülen minute 55buba nung skipper Manpreet Singh-i pass asüba ball ka Simranjeet Singh-i kanga junga idakja parnok point asem ngutetogo.
India team taruba asaya Korea den Deobarnü asayatsü aser iba sülen March 26 nü Malaysia, March 27 nü Canada aser March 29 nü Poland den asayatsü.
Round robin league stage nung temaba jenjang nung tembangba team ana March 30 nü final asayatsü.
Mezüngbuba quarter nung telok anapronglai goal ka danga magütsüteti asayaba sülen India team-i tanem tanemi asaya amokbanga asaya. Tanabuba quarter tenzüker minute ti buba nung India nunger nem penalty corner ka agütsü koba Varun-i aibelen mesüi idaktsü.
India nunger midfield skipper Manpreet aser Kothajit Singh nati kanga junga asaya aser goal idaktsütsü asoshi maongka aika agütsü saka forward temi goal magütsüteti liasü.
Tanabuba quarter atemtsü minute 4 anunga lia Mandeep Singh-i goal ka tera agidang midaktsü.
Tasembuba quarter nung Japan pur nem mezüngbuba penalty corner agütsü saka India goal keeper PR Sreejesh-i ball kanga junga nokdanga liasü.
Iba sülen India aser Japan napronglai goal idaktsütsü asoshi maongka angu saka magütsütet.
Quarter tasembuba atemtsü minute ana lia Japan nunger striker Kenji Kitazato-i kanga tasüita goal idaktsütsü merang saka pai zükloktsüba ball post adena talangka oadok.
Quarter pezübuba nung India team-i maneni goal idaktsütsü asoshi meranga asaya aser minute ana tsüngda mezüngbuba penalty corner angu. Ajisüaka Varun-i goal magütsütet aser iba ajanga Japan nunger nem kanga kara counter attack asütsü maongka agütsü koba Birendra Lakra kanga kümküma aliba ajanga nokdangtet.
Japan nungeri India team raksatsütsü asoshi tasa balala amshia asaya saka makok.
Minute 55buba nung Japan nungeri asayar talila ka kümdaktsütsü asoshi parnok goal keeper anitet saka meyiper parnok nemang Simranjeet-i goal ka idaktsü.
Iba sülen minute ana tsüngda Japan nunger nem penalty corner ka agütsü, saka parnoki goal magütsüteti asaya tembang.