India-i Indo-Pak Indus Water Treaty agientsüa akok

Delhi, September 25 (Agencies): 1960 küm India aser Pakistan na tsüngda Indus Water Treaty tezüngzüktep agiba reprangshitsü atema Centre sorkari Hombarnü senden ka ayongogo.
Osang ajanga angazükba agi, iba senden nung Water Resources Ministry aser Ministry of External Affairs-i Ato kilonser, Narendra Modi dang iba tezüngzüktep indang osang balala metetdaktsütsü.
September 22 nü India-i, “Iba ama tezüngzüktep ka junga aotsü atema tamang katettsü aser amalitepa inyaktsü nüngdak,” ta metetdaksüogo.
Tawa kiralongrartemi J&K, Uri nung army 18 tepsetba sülen tang linük nung aikati, India sorkari Pakistan den tzü tezüngzüktep agiba agientsüla,  ta ola adokba mapang ka nung iba senden ayongogo.
MEA otongdar, Vikas Swarup-i, “Iba ama tezüngzüktep junga alitsü atema anatsülen (Pak-India) tsüngda tamang katettsü aser amalitepa inyaktsüji kanga tongtibang. Iba ya külen nungi dangbo mesütet,” ta shiogo.
Iba dak sentakba nung September 24 nü Jammu & Kashmir Deputy Chief Minister, Nirmal Singh-ia, iba tezüngzüktep atema Centre-i kechi telemtetba agidir state-i pusemtsü, ta sangdongogo.
1960 küm September ita nung taoba mapang Ato kilonser, Jawaharlal Nehru aser Pakistan Tir, Ayub Khan nati iba tezüngzüktep agir küm 56 jungogo. Iba tezüngzüktep nung ayong trok- Beas, Ravi, Sutlej, Indus, Chenab aser Jhelum tzüji linük ana tsüngda lemsatepa agitsü bangjema lir.