India-i IS anema raratsü memelatsü: Home Ministry

New Delhi, September 17 (Agencies): Tanü Centre sorkari, India nungeri Iraq aser Syria linük na nung Islamic State (IS) anema meraranüba kuli metetdaktsüogo.
Bodhbar nü sorkari Delhi High Court dang, IS anema raraba nung India nunger denra, ibaji ajanga India nung tamangba yimsü lokti balala tsüngda rara adoktsü akok, ta ashi.
High Court nung agütsüba affidavit nungji Ministry of Home Affairs (MHA)-i, India nunger Islamic State den raratsü atema Iraq aser Syria linüki meyokner, kechiyong ibaji ajanga parnok India-i meyipa aruba sülen rara adoktsü akok, ta shia lir.
“Iraq/Syria rara nungji tamangba telok kar shilem agitsü melaba ajanga India nung tanga tamangba telok kati iba anemaji inyaktsü akok, aser ibaji ajanga India nung tamangba yimsü balala tsüngda rara adoktsü, aser iba nungji linüki majemokner,” ta ministry-i affidavit nungjisa shia lir.
Home Ministry-isa, Islamic State kiralongrartem anema rara nungbo, ibaji ‘kiralongraba mapa inyakba’ den kasa asütsü. Iba dak alia bendang linüktem den tesentaktep junga aliba raksatsü, ta ashi.
“Rara ka nung shilem agitsü atema India nunger tanga linük kati yokbaji ajanga, India sorkari tanga linüktem nung kiralongraba inyaktsü ajungshir, ta tai tongloktsütsü,” ta ministry-isa ashi.
“Muslim nunger tentet aikati IS anema raratsü atema temelungertem yoktsü sentong yangludar ta osang angazükba sülen sorkari ibaji nokdangtsü atema mera agidar,” ta sorkarisa shisem.