India-i Islamic State anema raratsü renema lir: Parrikar

New Delhi, Dec. 16 (Agencies): Bodhbar nü India-i, United Nations (UN)-i bangzüng ka renemra India-i UN wako kübok ISIS kiralongrar telok anema raratsü renema lir, ta ashi.
Tawa Union Defence Minister, Manohar Parrikar US Defence Minister Ashton Carter den Washington nung tongtibang senden ka menogo aser pai, India-i ISIS indang Intelligence osang lemsatepa arur aser ibaji tajungba akümtsü, ta ashi.
Bodhbar nü ‘Vijay Diwas’ anogomung nung India Gate, Amar Jawan Jyoti nung 1971 küm rara nung asürtem nem naro toktsüba sülen osangbenertem den jembidang Parrikar-i, “UN bangzüng ka lira aser UN wako aser UN mission ka lira onoki shilem agitsü ta onoki jangjajangja shiogo,” ta ashi.
India-i UN wako kübok ISIS anema raratsü asü ta asüngdangba langzüdang pai, “ibaji UN-i bangzüng ka renemba dak keta lir,” ta ashi.
Tan ita tetenzüklen India-a Paris nung alima linüktem senden nung denogo aser iba senden nung IS telok indang senotsü network onük jembia liasü.
India nunger security osang ajanga ashiba agi, tang India nunger 20 shi Iraq-Syria nung ISIS atema raratsüdar. Parnok rongnung Mumbai, Kalyan nungi lanur ana, Australia nung alir Kashmir nunger ka, Telangana nungi lanur ka, Karnataka nungi ka, Oman nung alir India nunger ka aser Singapore nung alir India nunger ka densema lir.