India-i Japan den Nuclear tezüngzüktep agi

Tokyo, November 11 (Agencies): Hokolbarnü Japan linüki India den civil nuclear nung amalitepa inyaktsü atema tezüngzüktep agiogo, koba ajanga linük ana indang industry tem tsüngda amalitepa inyaktsü.
Ato kilonser, Narendra Modi aser Japan Ato kilonser, Shinzo Abe na senden amenba sülen Modi-i, Japan o India nati linük tesentaktep tajungba akümtsü atema lenla balala nung tezüngzüktep tuku agiogo, item rongnung nuclear tashi yimjung nung amshitsü atema amalitepa inyaktsü tezüngzüktep dena lir, ta metetdaktsü.
Linük ana tsüngda küm trok tashi iba atema jembia aruba sülen tanü nuclear tezüngzüktep agiogo.
Osangbenertem senden nung Modi den külemi jembidang Abe-i, nuclear tashi yimjung lenmangtem nung amshitsü atema tezüngzüktep agiba atema pelar, ta ashi.
Abe-i, “Iba tezüngzüktep agiba tamendakdakji- India-i yimjung atema nuclear energy timi amshitsü lir,” ta ashi.
“Iba ya (tezüngzüktep) alima nung nuclear raraba oset malitsü atema Japan’er nükjidong den sentaktepa lir,” ta paisa ashi.
Paisa ashiba agi, 2008 küm September ita nung India-i nuclear tashi yimjung atema dang amshitsü aser nuclear tendangba thinentsü sangdongogo.
Modi-isa, “Nuclear Energy yimjung lenmang nung amshitsü atema amalitepa inyatsü asoshi tanü tezüngzüktep agiba ya otsüsütsüka lir,” ta ashi.
“Iba tsütsü asenoki amalitepa inyakba ajanga asenoki alima tzümopung melenshiba tayongzükba anema raraba nung asenok yaritsü,” ta shia Modi-i Abe, Japan sorkar aser Parliament dang pelaba lemsatep.
India den civil nuclear tezüngzüktep agia aliba linüktemji US, Russia, South Korea, Mongolia, France, Namibia, Argentina, Canada, Kazakhstan aser Australia lir.