India-i kecha linük tsütsüa tenük meyoker : PM Modi

New Delhi January 9, 2018 (Agencies) : India nungeri kecha linük rongsen tsütsü tenük yoktsü mesüra jangjongmaria inyaktsü tebilemba mali, ta tanü India Ato Kilonser, Wb. Narendra Modii shiogo.
Tanü New Delhi yimtiba Pravasi Bharatiya Kendra nung PIO Parliamentarians Conference lapoktsüba sentong nung jembidang pai iba o ya metetdaktsü.
“Shinga rongsena ozü tajangzük atema amshitsü tebilemba mali mesüra shinga lushi nunga tenük meyoker. Aseni kechi inyakteter mesüra adokteter ibaji dang renloka bener aotsü meranga arudar,” ato kilonserisa nenshia metetdaktsü.
China nunger den arrtsülen tensa mesüngjemteti aliba mapang ka nung pai iba o ya sangoktsüogo.
Paisa ashiba agi, “Alima rangben ajungtsü mechi India nungeri teti shilem atjung agia arudagi. Tajangzük mesüra takoksa shisadanga onoki kecha linük dena inyaka maru saka meimchir aria bilemba tsütsü dang temulung agütsür.”
Putu 21 buba yabo Asia nunger linüktem atema maongka tulu asünung idakji India nungeria inyaktsü tongti shilem lir, ta Modi-isa metetdaktsü.
India nunger tashi taitba küma aobaji alima ajungai meteta kümdar asünung, India nungertemi peisasa nüma tanga bilemtsüji tim dang, ta kasa senden nung adenshia alirtem den paisa lemsatepa liasü.
Linük rongsenren tsütsü renloka aobaren nung nenokia shilem tajung agitettsü, ta alima ajungalen aliba India nunger ozüng yanglurtema PM Modi-isa ayongzüka jembi.
FDI mapatong ajanga taoba küm asem tsüngda otsü asütsüsa bendanglen nungi India nung US dollar sen billion 16 amshia mapa inyakdagi; ibaji pai aniba sorkari mapatong melenshia inyakba ajanga lir, ta paisa nüma tanga bilemba olen ka shisem.