India-i kiralongraba matsüngdang mapudaktsü: Modi

New Delhi, August 15 (Agencies): Pakistan-i Baluchistan aser PoK nung ozüng alema inyakba mapatem aija tanü Ato kilonser, Narendra Modi-i, India-i kiralongraba matsüngdang mapudaktsü, ta shia lanurtem dang raraba toktsür linük tangatetba sülen anidaktsü ayongzük.
Hizbul Commander, Burhan Wani tepsetba sülen Kashmir nung tensa mejungi akümba metetshii Modi-i, Pakistan-i kiralongrartem tushir aser India nung nisungtem tepsetba atema benjungteper, ta aitsü.
Tanü Red Fort nungi Independence Day onük minute 93 jembidang Modi-i, “Peshawar (Pakistan) nung aliba school ka nung kiralongrartemi tanurtem tepsetdang asen Parliament nung nüktzü liasü. India tanurtem tsübutep. Ibaji asenoki meimchir meimba tatishitsü lir. Ajisüaka külenji (Pakistan) reprangdangra kiralongraba tushir,” ta ashi.
India-i kiralongraba aser rara matsüngdang tila makümtsü ta shia Modi-i lanurtem dang raraba toktsür linük tangatetba sülen anidakang, ta ashi. Iba o ya pai Kashmir lanurtem ayongzükba ama angateter.
“Ni lanurtem dang, ano mapang lir, meyipa arua linük sülen anidakang aser ner tsüraburtem mangdang atalokjang. Taküm tesünep nung liang, raraba agi shinga tajangzük mangu,” ta Modi-i ashi.
Tanü Modi-i jembiba tongtibang onük kar:
* Linük nung tebilemtsü onük aika lir, ajisüaka itemji koktettsüsa asenok nütsüng billion 1.25 shisatsü lir.
* Nüburtemi Income Tax tsübur, iba tangatetbaji onoki melenshitsüner.
* Ni sensakertem taküm nung temelenshi bener arutsüner, aser iba atemaji ni inyaktsü.
* Tanübo tongtibang sorkar hospital ajak nung online registration angur aser online nung medical records angur.
* Yim 18,000 nungi yim 10,000 dak tema nung electric light agütsüogo, aser tanübo parnoki Independence Day benjungmung sentong reprangdar.
* GST ajanga asen linük rongsenkettsüng tashi itshitsü, aser iba ozüng pusemba atema ni party ajak dang pelar.
* Ni asen kidangertem (linüktem) dang ya ashir, “Asenok tsüngda raraba ajanga kati ka samatsütsü, asenoki sensak tia anema raradi, asenok senteper sensak tia anema raraba ajanga dang asenok azükarutsü.”
* Mapang ka nungbo passport angutsü inyakyim tasak aser mapang agia liasü, saka tangbo hopta 1-2 tsüngda angur.
* Sorkari lokti nung temelenshi atema inyaker; tanübo yim 70,000 nung open defecation mali.
* Taoba küm ana tzünglu junga maruba ajanga aonsotsü nung jenjang atuba tebilemtsü sorkari ajuruogo. Taoba sorkar kübok jenjang rate shilem 10 dak tema atu, saka onokibo shilem 6 adena atutsü memelar.
* Ozü linük nung aluyimertemi tzü peria ngura parnoki ali agi hon kümdaktsüteter, ibayongji tzü kümzüka ayutsü atema sorkari inyaker.
* Ochimashi nokdangtsü atema onoki Aadhar card sorkar schemes nung dendaktsüogo.
* Sensak tia koktettsü atema tetsürtem rongsenkettsüng jenjang ajungkettsü aser shilem agitsütsü kanga tongtibang.
* Asenok tesünep nung lidaktsütsü mechi arrtsülen raradang sepai 35,000 dak tema süogo, anungji asenoki parnok bilemtettsüla.
* Tesüiba anogo 100 tsüngda sorkar sensaker kibong lakh 50 nem sorochiokba gas (LPG) angati connection agitsüogo.
* Ozü sorkari ex-servicemen nem One Rank One Pension (OROP) agütsüogo.
* Lokti telemsa balala telongjem nung alibaji asen tashi. Asen lokti nung raratsü atema tesem mali.
“Kü adianu aser aianutsürtem, Independence Day anogomung nung asenoki tashi tasen nung aser teimla tasen nung tejakleni odi. Asen linük atema bendanga agütsütem taküm ajanga asenok ajungmesodaktsür iba linük atema lidi, linük atema inyakdi, asen teinyaktsütem inyakdi aser tangara ajungshidi. Asen nükjidongtem ataloktsü atema lokti ka, mangdang ka, telemtetba ka aser lenmang ka nung asenoki jajadi,” ta Ato kilonseri linük nüburtem ayongzük.