India-i kiralongrar atema mera tesashi agitsü:Tir

New Delhi, February 23 (Agencies): India Tir Pranab Mukherjee-i, arrtsü atena aita linük nung kiralongrar atema mera tesashi agitsü aser kiralongraba ya alima rangben asoshi lendong lir, ta Mongulbarnü ashi.

Security force temi tawa Pathankot air base nung kiralongrar sentong takok ngua raksatsüba asoshi Mukherjee-i tenüngsang agütsü.

“Kü sorkari linük kümzüka ayuba tsütsü takok tashi bendanga agüja aser nendaka inyaktsü. Kiralongra mapa ya alima ajak asoshi tetsübutsü lendong bena aruba inyakyim ka lir anungji iba tetsübutsü mapa nokdangtsü asoshi mera tesashi agitsübaji alima ajak nung nüngdak aser parnok inyakyim meshimeshia samatsütsü meranga inyaktsüla,” ta Mukherjee-i ashi.

“Tawa kiralongrartemi Pathankot air base amaktsü merangba mapang security force temi parnok sentong kanga takok ngua raksatsüba atema ni sepaitem tenüng asanger aser arrtsü atena aita kiralongraba nokdangtsü asoshi mera tesashi peria agitsü,” ta pai ashi.

Paisa shiba agi, linük northeast tesemlena lendong aika sepaitemi azüoker.

“Left Wing telok agi sünga aliba state tem aser northeast tesemtem tensa tang tajungba küma azüoktetogo. Iba takok ya intelligence agencies aser security forces temi state sorkar tem den angatettepa inyakba ajanga lir,” ta Mukherjee-i ashi.

‘One Rank One Pension scheme’ indang jembidang pai, “Linük asoshi bendanga aguja tenzükertem ajanga asenok tali ajungmesor aser parnok mapa tajung alang asenoki kecha meyipa magütsütettsü,” ta ashi.

“Tenüngsang agütsüba kija agi teperi masü anungji küm nung sen crore 7,000 aotsü sentong ka süaka, küm pezü tashi parnoki takhanga ola agüja aruba ‘One Rank One Pension’ kü sorkari ataloktsüogo,” ta paisa ashi.