India-i kodanga mezüngbuba injangji meyoktsü: Rajnath

Maharajganj (Uttar Pradesh), August 30 (Agencies): Tanü Union Home Minister Rajnath Singh-i, India-i kodanga mezüng injang meyoker aser meyoktsü, ajisüaka parnok tsütsülen nungi injang yokra, Pakistan-i taochi mimlatsüla, ta ashi.
“Kuli kecha makai November ita nungi tenzüka Pakistan-i asen arrtsülen injang yoker. Asen sepai pongu taküm bendanga agüja asüba aser ki jenti raksaba ni metetogo. Ni BSF sepaitem dang, kechiba asenoki ibaji memeyiptsür ta asüngdangba mapang parnoki, ken o jembitettsü aser injang yokba anentsü asoshi asenoki wako temesüng ayipshir, ta langzü. Ni parnok dang, injang mezüngbubaji asen tsütsülen nungi masütsüla, ajisüaka asenok dak injang kahloktsüra asenoki sashia raratsüla ta shiogo,” ta Maharajganj district nung lokti senden ka nung jembidang Home minister Rajnath-i ashi.
Home Minister-isa Pakistan dang, India nungeri par arrtsülen injang yoka ali asü, aser parnoki tai maket nüburtem taküm agiteter noh (?) ta ashi.
“Tanü tashi kiralongraba onük nung India-i Pakistan den ken o jembiner. Iba asoshiji asen Ato kilonseri kanga meranga inyaker, ajisüaka mataloker. Kodangsa asenoki ken o jembitsü asoshi merangdir, idangji parnoki injang yok tenzüker,” ta Rajnath-i ashi.