India-i linük kümzüktsü atema tashi ajak amshitsü: Kovind

New Delhi, March 04 (Agencies): Tanü linük Tir, Ram Nath Kovind-i, India-i yimjung atema nokdaker, ajisüaka linük kümzüktsü atemabo India-i akokba tashi tashi ajak amshitsü, ta metetdaktsü.
February 14 nü kiralongrartemi Jammu & Kashmir kübok Pulwama amakba sülen IAF-i Pakistan nung JeM kiralongrartem camp maaka liasü, aser iba dak sendakba nung pai iba olen ya jembiogo.
Tanü sentong ka nung jembidang linük Tir, Kovind-i, alima nung India jenjang junga kümdar aser armed forces sepaitem dak tashi tulu lir, ta ashi.
“India-i maneni yimjung atema nokdaktsü, ajisüaka nüngdak dang süra linüki kümzüktsü atema tashi ajak amshitsü. Uniform nung aliba asen sepaitemi nüngdakba mapang nungbo aramesotsü,” ta Kovind-i ashi.
Paisa, linük armed forces tashiji air force sepaitemi amshiogo, aser ibaji ajanga asen linük kümzüktsü atema asenoki nokdakba kuli sayur, ta ashi.
“Parnok tasü aitba aser tashiji tawa sayaogo, kechiyong Indian Air Force-i kiralongrartem camp ka amak,” ta pai ashi.
February 26 nü Indian Air Force-i Pakistan nung aliba kiralongrar Jaish-e-Mohammed indang training camp maaka liasü.
Air Force Station, Hakimpet aser 5 Base Repair Depot nem ‘President Colours’ agutsüba sülen Tir, Kovind-i item o ya jembia liasü.