India-i linük merüktettsü atema merangdar: Narendra Modi

New Delhi, February 26 (Agencies): India linük merükteta akumtsü atema senso ajaki meranga inyakdar, ta Deobarnü Ato kilonser, Narendra Modi-i metetdaktsü.
Ita shia Ato kilonseri radio sentong, ‘Mann Ki Baat’ ajanga linük nüburtem den jembir, ajioda tan ita sentong nung Modi-i, “Merükmejutsü atema sorkar, lokti tentet balala, rejutem, sensotem aser ajaki lenmang ka mesüra ka ajangabosa inyaker,” ta ashi.
“Merükmejutsü atema ajaki inyaker, aser sorkari iba atema maneni inyakdar,” ta paisa metetdaktsü.
Linük tesem balala nung merükmeju mapa inyakba dak sentakba nung pai, Telangana, Warangal nung merükmeju sentong ka ayongzüka state 23 nungi tongti ketdangsertemi shilem agia liasü, ta metetdaktsü.
Modi-isa, February 17 aser 18 nü Hyderabad nung metsümeshidak ongken azüngtetba maparen inyaka liasü, ta ashi.
“Tatishitsü tajung sayua ketdangsertemi ki trok nung metsümeshidak ongken azüngteta merüktet, aser itemji tanaben amshitsü atema tesayuba agutsü,” ta Modi-i ashi.
“Asenoki tanga merüktetba ama metsümeshidak ongken-a merüktsü akok,” ta paisa ashi.
“Ongken nung scüji ita 6- 12 tsüngda nungbo shizüker. Shizükba scüji ‘fertilizers’ ama amshitsü akok,” ta paisa ashi.