India-i longjemer raratsü, longjemer akoktsü: PM Modi

New Delhi, February 28 (Agencies): Security sepaitem melung ajema mekümdaktsütsüji kanga tongtibang, ta shia tanü Ato kilonser, Narendra Modi-i, India-i longjemer raratsü, alitsü, inyaktsü aser takok angutsü; shingaia linük terenlok lenmang nung tetsükdaktsü agutsütsü makok, ta metetdaktsü.
Tanü Ato kilonser Modi-i video conferencing ajanga India tesem balala nung BJP nung inyaker crore 1 shi den jembia liasü, aser BJP-i ashiba agi ibaji alima nung video conference tulutiba asutsü-a akok.
Modi-i, 2014 election nung nüburtemi BJP nem takok ngudaktsübaji nübur nükjidong atalokdaktsütsü atema liasü, aser 2019 küm election ji nüburtem tejangraba atalokdaktsütsü atema asutsü, ta ashi.
“India nungerji lenla ajak nung meranga inyakertem asütsüla, aser ajaki linük kümzükertem dang pelatsüla. Parnok (sepaitem) ajanga linüki terenlok nung jenjang tajung alangzüktettsü,” ta pai ashi.
“Nisung kari parnok nija tajangzük atema tashitait sorkar ka maginer. BJP nung inyakertemi sorkar tashitait ka ajanga tajangzük balala anguba nüburtem dang sangdongtsüla,” ta Modi-i metetdaktsü.
“Asenoki asen defence forces tashi nung tamang akar. Anungji parnok nükjidong nung mekongshitsüji kanga tongtibang. Asen tsükchirtemi asenok tashi meitdaktsütsü meranger, asenok anema kiralongrar, asen linük ainba parnoki nokdangner. Asenok ajak linük senso tajung kaka lir aser parnok asalentong tamajung anema asenok mitsa ama nokdaker,” ta pai ashi.
“Tang ama mapang ka nung linük teshisadangngba jenjang balaka nung lir. Arrtsülen linük sepaitemi tasütait tanela sayur. Linük nübur ajaki asen sepaitem nungiter aser alimai asenok temelungtetba angur,” ta paisa shisem.