India-i Mallya anir arutsü atema UK dangi shidi ka züluogo

New Delhi, April 28 (Agencies): Shishilembar tetsüti, Vijay Mallya linüki tanaben meyiba anir arutsü atema  Brihostibarnü India sorkari maparen tenzükogo.
Bank balala dang sen 9,000 dak tema apoba sentsüh motetba ken o Mallya anema benoka lir, iba den külemi pa India-i arua iba ken o bushisüngdangerem den yariteptsü atema aiben jaokogo, ajisüaka pai aji oda meinyak.
“Prevention of Money Laundering Act 2002 kübok Mallya anema bushingdangba mapang pa alitsü atema Ministry-i Delhi nung aliba UK High Commission dang shidi ka ajanga pa anir arutsü atema mepishiogo,” ta MEA otongdar, Vikas Swarup-i ashi.
UK nung aliba Indian High Commission-ia kasaji UK foreign & commonwealth office nem metetdaktsütsü, ta Vikas Swarup-i ashi.
External affairs ministry-ia Mallya anir arutsü atema India-i maneni UK ketdangsertem den inyaktsü, ta shiogo. Iba ken o bushisüngdangba nung Mallya-i bushisüngdangertem den yariteptsü atema Enforcement Directorate (ED)-i pa asemben tashi jaoka liasü, ajisüaka iba ken o nung pai meyaritepba ajanga sorkari Mallya indang passport meyipa agiogo.
Mallya anemasa bail magütsütsü warrant lir.
“Item (PMLA) bushisüngdang aser bail magütsütsü atema Mumbai Special Judge-i benokba sülen taoba hopta Mallya indang passport meyipa agiogo. Maneni iba maparen ya onoki UK ketdangsertem den inysktsü,” ta Swarup-i shisem.
Taküm March 2 nü Mallya-i India toktsür UK-i ao. Pai British ketdangsertem dang pa maneni linük nung alitsü temelaba meshitsüa akok, mesüra pa indang passport meyipa agiba anema ken o benoktsüa akok.
Tan hopta Centre-i Supreme Court dang parnoki court ajanga maparen tenzüktsü aser British sorkar den tongtepratepa inyaktsü ta metetdaktsüogo.
Mallya indang advocate-i court ka nungbo, Mallya tanaben arura pa Delhi airport nungi  indangindanga Tihar Jail-i anir aotsüa akok, ta melung malemba o jembiogo.