India-i NE den tesendaktep tali tajungba yanglutsü nüngdak: Aiyar

Guwahati, February 19 (Agencies): Taoba mapang Union Minister, Mani Shankar Aiyar-i, North East India ji tanüngba India den tesendaktep tajungba kümogo, ajisüaka north-east terenlok atema tesendaktep ano tajungba küma yanglutsü nüngdak, ta ashi.
Yashi pai, “North East sendoka yutsür ta jembiba tu shitak mesüi kümogo. Tesendaktep tajungba akumba ajanga NE nungi lanurtemi linük tanga tesemtem nung mapa bushitsü maongka aika nguogo, iba den külemi tanüngba India nungi lanurtemia yangi (Northeast) mapa maongka bushir,” ta ashi.
University of Science & Technology, Meghalaya-i ayongzükba North East Graduate Congress 2017 sentong nung jembidang taoba mapang DoNER Minister, Aiyar-i, India terenlok atema NE region tesem nung terenlokji kanga tongtibang, ta ashi.
NE Graduate Congress nung ya NE nung state balala nungi graduate course balala agir kaketshir 10,000 lir. Iba sentong ya taküm agi küm pezübuba ayongzüka akar. Iba sentong ya lanurtem sendakteptsü iba den külemi telongjem ajungkettsütsü, career counseling agütsütsü aser sempet balala sayatsü atema sabang agütsütsü nükjidong nung ayongzüka akar.
Kasa sentong nung Guahati University Vice Chancellor, Dr Mridul Hazarika aser USTM Chancellor, Mahbubul Hoque nungeria jembia liasü.
Iba sentong nung USTM VC, PG Rao-i tesentepertem pelaa agizük aser sentong lenirji shisashir, NK Choudhury liasü.