India-i Nehru nem akhüm agütsü

New Delhi, November 14 (Agencies): India nung mezüngbuba Ato Kilonser, Jawarharlal Nehru sor küm 126 ajungba bilemtba anogomung nung tanü Ato kilonser Narendra Modi-i asür bilemteta akhüm agütsüogo.
“Pandit Jawaharlal Nehru akümli mapangji India nüjiso angutsü atema bendang agütsü aser mezüngbuba Ato kilonser inyaka India len ani. Pa asoba anogomung nung pa nem akhüm agütsür,” ta Ao kilonser Modi-i twitter ajanga ashi.
Nehru-i tanurtem meimba aser shisaliok nung shilem tulu agiba ajanga linük nung iba anogo nungsa Childrens’ Day-a amunger.
Ano külen Tir Pranab Mukherjee, tatong Tir Hamid Ansari, taoba Ato kilonser Manmohan Singh, Congress Tir Sonia Gandhi aser Congress tatong Tir Rahul Gandhi nunger densema lenir aikati Shanivan nung Nehru nem akhüm agütsüogo.
Tir Mukherjee-isa tanurtem nem pa temoatsü agütsüba den külemi, linük tarutsü putuji tanurtem ket nung lir, ta ashi.
“Tanurtem Anogo nung iba linük nung tanur ajak ni moatsür aser parnok atema sarasademtsür. Asen linük tarutsüji asen tanurtem ket nung lir,” ta Pranab-i twitter ajanga ashi.
Tirisa, tanurtem nem maongka agütsütsü tim agütsüra aser tim lenmang nung anira lokti aser meimchir tajangzük ngudaktsütsüsa parnok dak tashi lir, ta ashi.
“Maongka tim tagütsütsü agüja len anira parnoki (tanurtem) lokti aser meimchir ajangzükdaktsütsüsa parnok dak tashi lir. Linük tarutsü atema nükjidong tulu atemzüka ayutsü aser parnok dak aliba sempet jangjatsü astema asenoki tanurtem ajungshitsüla,” ta Pranab-i ashi.